నీటిముల్లు

"వాన జల్లు గిల్లుతుంటే ఏట్టాగమ్మా, నీటిముల్లే గుచ్చుకుంటే ఏట్టగమ్మా, సన్న తొడిమటి నడుముందిలే లయలే చూసి లాలించుకో.." చక్కని సంగీతంతో ప్రశాంతంగా సాగిపోయే ఈపాట వచ్చేనాటికి నేను అయిదు లేదా ఆరవ తరగతి చదువుతున్నా అనుకుంటా. ఈ పాట విన్న ప్రతిసారి నాకు మా బీఎండీవై (బత్తుల మురళీధర్ యాదవ్) గాడు గుర్తొస్తాడు. సిట్స్ బర్గ్ గారి బర్మింగుహోమురో బత్లెహేము పెన్సిల్వేనియా అని పాడుకునేవాళ్ళం. ఇదేంటి, ఈ చరణాలు పాటలో లేవే అని తికమక పడకండి, సాంఘీక శాస్త్రంలో ఎవో ఊర్ల పేర్లు గుర్తుంచుకోవడానికి ఈ పాటలోని చరణాల్లాగ పాడుకునేవాళ్ళం. అలా పాడుకోవడంవళ్ళ అవి ఈనాటికి గుర్తుండిపోయింది. అంతా బానే ఉంది కానీ ఇక్కడొ సమస్యుంది, పాటల్లో సంగీతంకన్నా కూడా భావాన్ని ఎక్కువగా వెతుక్కునే నాకు ఈపాటలో ఒకపదం ఈనాటికి ఒక చిక్కుముడిలా మిగిలిపోయింది. నీటిముల్లు ఏంటి? నీరు బావుంది, ముల్లు బావుంది కానీ నీటిముల్లు? ఆ నీటిముల్లు ఏదో గానీ  నేరుగా నా మెదడులో గుచ్చుకుంది.

మళ్ళీ కొంతకాలానికి ఇంకోపాట అందులోనూ అదే నీటిముల్లు, "వాన గడియారంలో, నీటిముల్లు గంటకోడితే". నిజానికి ఈ పాట నాకు ఏమాత్రం  నచ్చలేదు కానీ నీటిముల్లు మాత్రం గంటకొట్టి మరీ నా మళ్ళీ మెదడులో గుచ్చుకుంది.

పోనీ అంతటితో అయినా నన్ను వదిలేసిందా అంటే అబ్బే లేదే. మరో కొత్తరూపం సంతరిచుకొని కొత్తపాటగా, "నీటిముల్లై నన్ను గిల్లి వెళ్ళిపోకే మల్లె వాన జంటనల్లే బంధమల్లే ఉండిపోవే వెండి వాన తేనెల చినుకులు చవి చూపించి కన్నుల దాహం ఇంకా పెంచి కమ్మని కలవేమో అనిపించి కనుమరుగై కరిగావ సిరి వాన " అనుకుంటూ వచ్చేసింది. నేను మాత్రం, "నువ్వొస్తానంటే నెనొద్దంటానా" అని అనలేదండి, తనే వచ్చి గిల్లింది.

ఈ పదానికి అర్ధం నిజమైన అర్ధమేంటో నాకు ఈనాటికి తెలీదు కాని, ఈ మూడు పాటలు పక్కన పెట్టి పరిశీలించి చూస్తే మాత్రం "వాన చినుకు" అన్న అర్ధం స్పురిస్తోంది. ఆ వాన చినుకు అలా వచ్చి మీదపడితే ముల్లులా గుచ్చుకుంటుంది అని అర్ధం చెప్పుకోవాలేమో. ఇదే అర్ధంతో మొదటి పాట పరిశీలిస్తే, "వాన జల్లు గిల్లుతుంటే ఏట్టాగమ్మా, నీటిముల్లే గుచ్చుకుంటే ఏట్టగమ్మా" (నీటి చినుకు ముల్లులా గుచ్చుకుంటే అని చెప్పుకుంటే)అర్ధం సరిపోయింది. రెండో పాట "వాన గడియారంలో, నీటిముల్లు గంటకోడితే" (వాన చినుకు అనుకుంటే) ఇక్కడ కూడా అర్ధం సరిపోయింది. మరి మూడోపాట, "నీటిముల్లై నన్ను గిల్లి వెళ్ళిపోకే మల్లె వాన" (వాన చినుకులా నన్నుగిల్లి వెళ్ళిపోకు అనుకుంటే) ఇక్కడకూడా అర్ధం సరిపోతుంది.

ప్రస్తుతానికి నీటిముల్లుకు అర్ధం వానచినుకు అని అనుకుంటూ గడిపేస్తా. మళ్ళీ ఇంకోపాటలో ఈ నీటిముల్లు ప్రత్యక్షం అయితే అప్పుడు చూద్దాం.

ఈ బ్లాగు చదివే మిత్రులలో ఎవరికైనా నీటిముల్లుకు అర్ధం తెలిస్తే చెప్పి పుణ్యం కట్టుకోండి.